ភ្នំពេញ៖ រដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង បានអញ្ចើញបញ្ចុះបឋមសិលាបើកការរដ្ឋានសាងសង់អគារទីស្ដីការថ្មីរបស់ក្រសួងមហាផ្ទៃនៅព្រឹកថ្ងៃទី១១ ខែវិច្ឆិកានេះ។
អគារថ្មីនេះគ្រោងនឹងបញ្ចប់ការសាងសង់នៅឆ្នាំ២០២៣ខាងមុខ ក្នុងតម្លៃជាង៦០លានដុល្លាអាមេរិក។
នៅក្នុងឆ្នាំ២០២១នេះអគារថ្មីៗនៃក្រសួងស្ថាប័នរដ្ឋត្រូវបានរាជរដ្ឋាភិបាលធ្វើការសាងសង់ថ្មី និងកែប្រែឱ្យមានសោភ័ណភាពជាច្រើនក្នុងនោះមានក្រសួងសាធារណការនិងដឹកជញ្ជូន ក្រសួងដែនដី នគរូបនីយកម្ម និងសំណង់ ក្រសួងការពារជាតិ ក្រសួងរ៉ែ និងថាមពលជាដើម។
នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានថ្លែងក្នុងពិធីសម្ពោធអាគារថ្មីរបស់ក្រសួងដែនដីកាលពីថ្ងៃទី៨ ខែវិច្ឆិកា កន្លងទៅថា ការរៀបចំសាងសង់អគារថ្មីដែលមានស្ដង់ដាសម្រាប់ក្រសួងស្ថាប័នរដ្ឋនេះគឺដើម្បីបញ្ជាក់ពីដំណើរវិវត្តន៍របស់ជាតិកម្ពុជា។ សម្ដេចបញ្ជាក់ថា កម្ពុជាមិនអាចយកថវិកាជាតិមកធ្វើក្រសួងល្អបាននោះទេប្រសិនជាពលរដ្ឋមិនទាន់រស់នៅបានសមរម្យ។
សម្ដេចតេជោថា៖ «ឥឡូវនេះមិនអាចដូចមុនបានទេ! ផ្ទះប្រជាជនឡើងដល់ណាដល់ណីហើយ។ ហើយបើយើងទុកស្ថាប័នឱ្យនៅតូចតាច នៅកំបាក់កំពុកវាមិនស្របទៅនឹងកន្លែងផ្ដល់សេវាជូនប្រជាជន។ ដូច្នេះហើយយើងក៏មានតម្រូវការនឹងធ្វើការបែបនេះ» ៕